Ngā pakanga o Aotearoa Pouaka Petihana

Hei whakataki

He mea rīrā tēnei pouaka iti, māhaki nei i te hītori o Aotearoa. Koia nei tētahi o ngā pouaka petihana e whā i hangaia hei pupuri i ngā waitohu i neke atu i te 12,000 e tautoko ana i tētahi petihana kia whakatūria he rā whakamaumaharatanga ā-motu ki Ngā Pakanga Whenua o Aotearoa. I whakarewaina te petihana e ētahi tauira o Te Kura Tuarua o Ōtorohanga, arā, e Waimārama Anderson rāua ko Leah Bell i te tau 2014 i muri i tētahi haerenga ā-kura ki ētahi wāhi tāpua i te wā kāinga e whai pānga ana ki Ngā Pakanga o Aotearoa me te rongonga tuatahi i ngā kōrero a ngā kaumātua mō ngā āhuatanga i pā ki ngā wāhi pēnei me Ōrākau rāua ko Rangiaowhia i te wā o ngā pakanga. Ka huritao a Leah ki ōna whakaaro i taua wā, “He aha tātou e kore nei e ako mō tēnei? Ka nui hoki te whakahirahira, me te pātata ki a mātou.  He tokomaha hoki ngā tauira o tō mātou kura he uri nō rātou i whawhai i Ōrākau, i pūrere rānei i Rangiaowhia. He nui kē atu te whaipānga o ēnei kaupapa i ngā mea e ako nei mātou ki te akomanga tikanga ā-iwi.” Nā te tautoko me te akiaki a ngā hoa tauira me ngā kaiako, ngā whānau, ngā kaumātua me te hapori whānui anō hoki i tata te rua tau a Leah rāua ko Waimārama e huri haere ana i te motu, hei kohikohi waitohu mō te petihana.

E toru o ngā pouaka petihana e whā Ii hangaia e tētahie tauira toi o Ōtorohanga College, e Kiana Ormsby nōna e 15 tau te pakeke. Hangaia ai I ētahi rawatoi māmā i hokona i te toa rua tāra. I whakarapahia atu e Kiana he whāriki ki te taupoki o te pouaka pepa mārō, ka whakarākei ai ki te tukutuku Poutama hei tohu i te nanaiore ki te mōhiotanga me te mātauranga. “Tē taea e tātou te koke whakamua ki te kore tātou e mōhio ki tō tātou hītori.” tā Kiana whakamārama. “Hei tohu i te wā hipa, te wā tū me te wā heke.” I whakarākeihia te pouaka rākau tuawhā e te pāpā o Kiana, e Daniel Ormsby, ko ia hoki tētahi ringatoi.

I te mutunga o te tau 2015 i hoatu ngā pouaka me ōna waitohu ki te Whare Pāremata. Nā te petihana, i te tau 2018 i whakatūria ai he rangi whakamaumahara ā-tau ki Ngā Pākanga Whenua o Aotearoa, e mōhiotia nei ko He Rā Maumahara. Ka mutu, i te tau 2023 i whakatakingia ai Te Takanga o Te Wā te marautanga hītori o Aotearoa ki roto i ngā kura.

Whakaata ai tēnei pouaka kau, i hangaia rā i te akomanga i tētahi wā mīharo i mahi ngātahi ai ngā tauira kura me ō rātou hapori. Miramira ai te petihana i te take nui me mōhio, me mārama hoki a Aotearoa ki ōna anō hītori, inā koa ngā hītori e pā ana ki ngā Pakanga o Aotearoa nei, tae atu ki ngā tukunga iho whakatupuranga rau, moroki hoki mō ngā hapori huakāinga, engari kāhore tonu e mōhiotia ana e te nuinga o Aotearoa.

He tuhinga nā Lucy Mackintosh.